بسم الله الرحمن الرحيم
السلام عليكم و رحمة الله وبركاته
كثير منا لا يعرف قصة هذا المثل ولا يستغر ب هالشي !!
لأن بالوقت الحاضر قليل نلقى أحد يقول مثل ويقول
قصته بالعكس تلقى بعضنا يقول المثل ويصير المثل عليه
وهو مايدري لانه مايدري وش قصة المثل ؟
قصة مثل ياغريب كن أديب سلمكم الله
يقولك هذا رجل إشتهر بالكرم وكان كريم
جدا كرم مايوصف لكن بنفس الوقت اشتهر عن
هذا الرجل شي شين ....................؟!
وهو إنه يضرب ضيفه ؟
ولا يعقل أن هالميزتين يتوافقن جميع يعني ماتجي...........
كرم وقلة أخلاق ؟!
و اشتهر عنه هالشي اللي هو مثل
ماذكرنا إنه كريم وبنفس الوقت يضرب ضيفه ؟
مع مرور الأيام إنتقلت سمعة هالرجال للقرى المجاوره له ..
و كان فيه واحد قلبه حي
يعني يحب المرجله وعلوم الرجال وسمع عن هذا الرجل
هذا اللي كريم ويضرب ضيفه قال لازم اروح
و أتقهوى عنده و أشوف ليش يضرب ضيفه ؟
طبعا المسافة بعيده وبعد يومين وصل يم قرية
هالرجال الكريم ..
والرجال الكريم من أول
بيته معروف يكون بطرف الديره
يعني بمدخل الديره مثل مانقول
علشان الضيف اذا دخل الديره يصير من نصيبه
المهم دخل عند الرجل وسلم عليه
رحب به ترحيب يشرح الصدر
وهلابه واتحفى به الرجال راعي المثل
والضيف اللي جاي من بعيد جازله الوضع
بس بنفس الوقت خايف كل شوي يقول بقلبه :
الحين يبي يضربن الرجال ؟
الكريم سوى القهوه وهالضيف
ماغير ساكت ويناضر
وسوى الشاهي وصب للضيف فنجال
وقرب له القدوع وتقهوى وقدع
وصب له شاهي وشرب الشاهي الوضع كله زين ..
الى الحين مافيه ضرب ولا شاف اللي سمع عنه
وبعد الشاهي رحب وهلا وصب له قهوه
الضيف تقهوى وقضى قال أكرمك الله
يبي يمشي خلاص شاف إن
الرجال تمام التمام
قال المعزب حياك الله ..
إستغرب الرجال قال بصدره وين الكلام اللي سمعت
رده عليه مره ثانيه قال اكرمك الله قال حياك الله ...
قال أمشي أروح؟؟؟ قال إذا تبي تغدى معي حياك الله
قال لالا أكرمك الله بس خلاص أمشي قال إيه حياك الله
قال ماأنت ضاربني ؟
قال ليش أضربك ؟!
قال أنا سمعت أنك تضرب ضيوفك ؟
قال لا اللي سمعته ماهو صح
أنا أضرب الضيف اللي مايحترم المجلس ..
أما أنت تحترم المجلس أنا يجيني ناس مايقدرون قيمة المجلس ؟
ولا يعرفون آداب المجالس ولاهم رجال !!
قال الضيف كيف يعني ؟
قال يعني :
إذا سويت قهوه وفاحت الدله قال هه هه انتبه الدله فاحت ؟
واذا فاح البريق قال البريق إنتبه
انتبه فاح واذا النار دخنت قال زين النار دخنت علينا ؟
واقلق راحتي وهو في مجلسي !!
فلذلك اضربه و أطرده من المجلس لانه ماهوب رجل ..
أما أنت جيت وجلست وسويت عندك قهوه وشاهي
وشبيت ناري ولا تكلمت ؟
مع العلم
أن القهوه فاحت و إنكبت
وأنا متعمد هالشي ..
وأنت ماتكلمت وهذا يدل على أنك رجال كفو
وتحترم مجالس الغير ..
..ويا غريب كن أديب ..
قاله خوينا الله يجزاك خير وصح لسانك
وصدقت عندنا ناس ماتقدر المجالس وعلوم الر جال ..
وقالوا قديما
* إذا تضيفت فأجلس حيث يؤخذ بيدك لا حيث يؤخذ برجلك .
* ولا تحرك ساكن ولاتسكن متحرك .
* ولا تؤم الرجل في بيته وسلطانه إلا بإذنه
ولا ولا ولا
غفر الله لي ولك ولوالدينا
ولجميع المسلمين والمسلمات
والمؤمنين والمؤمنات الأحياء منهم والأموات
الذين شهدوا لله بالوحدانية ولنبيه بالرسالة
وللخلفاء الراشدين بالخلافة وماتوا على ذلك
| 
ليست هناك تعليقات:
إرسال تعليق